అల్లు అర్జున్‌ (Allu arjun)- సుకుమార్‌(sukumar) కాంబినేషన్‌లో ‘ఆర్య’, ‘ఆర్య 2’ వచ్చాయి. ‘ఆర్య’ అదరగొట్టగా… ‘ఆర్య 2’ ఫర్వాలేదనిపించింది. దాదాపు 12 ఏళ్ల తర్వాత హ్యాట్రిక్‌ మూవీ ప్రకటించగానే అందరిలోనూ మంచి అంచనాలు ఏర్పడ్డాయి. ఇక బన్నీని ఊర మాస్‌ లుక్‌లో ‘పుష్ప’ (Pushpa)గా పరిచయం చేసిన తర్వాత ఆ అంచనాలు రెట్టింపయ్యాయి. అల్లు అర్జున్‌ ఎర్రచందనం స్మగ్లర్‌గా నటించటం, రష్మిక (Rashmika) డీగ్లామర్‌ పాత్ర చేయటం, సునీల్‌, మలయాళ నటుడు ఫహద్‌ ఫాజిల్‌ ఇతర కీలక పాత్రల్లో నటిస్తుండటం ఆసక్తిని కలిగించింది. మరి ఎన్నో అంచనాల మధ్య విడుదలైన ‘పుష్ప’ ఎలా ఉంది?(Pushpa Movie review) పుష్పరాజ్‌గా మాస్‌ లుక్‌లో అల్లు అర్జున్‌ ఎలా నటించారు? అసలు ఈ సినిమా కథేంటి?

పుష్ప (Pushpa) అలియాస్ పుష్ప‌రాజ్ (అల్లు అర్జున్) ఓ కూలీ. ఎవ‌రికీ భ‌య‌ప‌డ‌ని మ‌న‌స్త‌త్వం. అయిన‌వాళ్లు త‌న ఇంటి పేరు కూడా లాక్కోవ‌డంతో క‌సితో పెరుగుతాడు. కూలీ చేసే చోట కేశ‌వ అనే స్నేహితుడు క‌లిశాక  పుష్ప (Pushpa) ప్ర‌యాణ‌మే మారిపోతుంది. కూలీ నుంచి ఎర్ర‌చంద‌నం స్మ‌గ్ల‌రైన పుష్ప… ఆ తర్వాత కొండా రెడ్డి (అజ‌య్ ఘోష్‌) అత‌ని సోద‌రుల‌కి స్మగ్లింగ్‌లో ఉపాయాలు చెప్పే స్థాయికి ఎదుగుతాడు. ఆ త‌ర్వాత ఎర్ర‌చంద‌నం స్మ‌గ్లర్‌ల సిండికేట్‌లో ఓ భాగ‌స్వామిగా, త‌ర్వాత సిండికేట్‌నే శాసించే స్థాయికి చేరుకుంటాడు. అప్పటివరకు ఆ స్థాయిలో ఉన్న మంగ‌ళం శ్రీను (సునీల్‌)కి కంట‌గింపుగా మారుతుంది. అపాయ‌క‌ర‌మైన మంగ‌ళం శ్రీను, కొండా రెడ్డి  బ్ర‌ద‌ర్స్‌తో శ‌త్రుత్వం పెంచుకున్న పుష్ప‌కి ఎలాంటి అనుభ‌వాలు ఎదుర‌య్యాయి? శ్రీవ‌ల్లి (ర‌ష్మిక‌)ని ప్రేమించిన పుష్ప ఆమెని పెళ్లాడాడా లేదా?కొత్త‌గా వ‌చ్చిన ఎస్పీ భన్వ‌ర్‌ సింగ్ షెకావ‌త్ (ఫహాద్ ఫాజిల్‌)తో పుష్ప‌కి ఎలాంటి స‌వాళ్లు ఎదురయ్యాయ‌న్న‌ది తెలియాలంటే ‘పుష్ప: ది రైజ్‌’ (Pushpa Movie review) చూడాల్సిందే!

ఇప్పటివరకూ వివిధ మాఫియాల నేపథ్యంలో వందల కథలను దర్శకులు వెండితెరపై చూపించారు. హవాలా, డ్రగ్స్‌, ఆయుధాలు, మనుషుల అక్రమ రవాణా… ఇలా చెప్పుకొంటూ పోతే ప్రతిదీ ఒక సబ్జెక్ట్‌ అవుతుంది. ‘పుష్ప’ కోసం దర్శకుడు సుకుమార్‌ ‘ఎర్రచందనం’ స్మగ్లింగ్‌ నేపథ్యాన్ని, మాస్‌లో మంచి క్రేజ్‌ ఉన్న అల్లు అర్జున్‌ని కథానాయకుడిగా ఎంచుకున్నాడు. ఈ పాయింటే ‘పుష్ప’పై అంచనాలు ఏర్పడేలా చేసింది. అందుకు తగినట్లుగానే ప్రేక్షకులను మెప్పించేలా కథ, కథనాలను తీర్చిదిద్దడంలో సుకుమార్‌ కొంతవరకు సఫలమయ్యాడు. ఎర్ర‌చంద‌నం ఎంత విలువైందో, అది మ‌న శేషాచ‌లం అడ‌వుల నుంచి జ‌పాన్ వ‌ర‌కు ఎలా ప్ర‌యాణం చేస్తుందో చెబుతూ ఆరంభ స‌న్నివేశాల్ని తీర్చిదిద్దారు సుకుమార్‌. ఆ ఎపిసోడ్ ప‌క్కాగా ఆయ‌న మార్క్‌తో ఆస‌క్తిక‌రంగా సాగుతుంది. ఆ త‌ర్వాత పుష్ప ప్ర‌యాణం మొద‌ల‌వుతుంది. ప్ర‌థ‌మార్ధంలో  హీరో నేప‌థ్యాన్ని, త‌న తండ్రి చ‌నిపోయాక ప‌రిస్థితులు మాత్రం కొంచెం భావోద్వేగాలు పంచుతాయి. ఆ తర్వాత ఎర్రచందనం రవాణా, సిండికేట్‌ తదితర వ్యవహారాలతో కథను ముందుకు నడిపిన దర్శకుడు ఆసక్తి కలిగించేలా ఆయా సన్నివేశాలను గ్రాండ్‌ లుక్‌తో తెరపై చూపించాడు. ప్రతి సన్నివేశం కథానాయకుడి పాత్రను ఎలివేట్‌ చేసేలా తీర్చిదిద్దిన విధానం ప్రేక్షకులను అలరిస్తుంది. ముఖ్యంగా బన్నీ అభిమానులకు కనులపండుగగా ఉంటుంది. ఒకవైపు పుష్పరాజ్‌ ప్రయాణాన్ని చూపిస్తూనే, మరోవైపు సిండికేట్‌ వెనుక ఉన్న అసలు పాత్రలను పరిచయం చేస్తూ సినిమాపై ఆసక్తిని పెంచాడు దర్శకుడు. పుష్పరాజ్‌ కూలీ నుంచి సిండికేట్‌ నాయకుడిగా అడుగులు వేయడానికి దోహద పడేందుకు అవసరమైన బలమైన సన్నివేశాలు తెరపై చూపించిన విధానం ఆకట్టుకుంటుంది. విరామం ముందు వచ్చే సన్నివేశాలు సినిమాకే హైలైట్‌గా నిలుస్తాయి. దీంతో ‘పుష్ప’ పాత్ర పతాక స్థాయికి వెళ్లిపోతుంది.

ఎర్రచందనం సిండికేట్‌లో అంతర్గత వ్యవహారాలను నుంచి వచ్చే పోటీని పుష్పరాజ్‌ ఎలా ఎదుర్కొంటాడన్న ఆసక్తితో ద్వితీయార్ధం చూడటం మొదలు పెట్టిన ప్రేక్షకుడికి నిరాశే ఎదురవుతుంది. తెరపై సన్నివేశాలు వస్తున్నా, కథ ముందుకు నడవదు. మధ్యలో శ్రీవల్లి ప్రేమ ప్రయాణం, పాటలు బాగున్నా, ఒక సీరియస్‌ మోడ్‌లో సాగుతున్న కథకు చిన్న చిన్న బ్రేక్‌లు వేసిన ఫీలింగ్‌ కలుగుతుంది. ఈ క్రమంలోనే ఎస్పీ భన్వర్‌సింగ్ షెకావత్‌గా ఫహద్‌ ఫాజిల్‌ పాత్ర పరిచయంతో సినిమాపై ఆసక్తి పెరుగుతుంది. ఇక్కడి నుంచి పుష్పరాజ్‌- భన్వర్‌ సింగ్‌ల మధ్య పోటాపోటీ ఉంటుందని ఆశించినా ఆయా సన్నివేశాలన్నీ సాదాసీదాగా సాగుతుంటాయి. ఒక బలమైన ముగింపుతో తొలి పార్ట్‌ ముగుస్తుందని ఆశించిన ప్రేక్షకుడు పూర్తి సంతృప్తి చెందడు. పార్ట్‌-2 కోసం చాలా విషయాలను ప్రశ్నార్థంగానే వదిలేసినట్లు అర్థమవుతుంది. మరో భాగం రావడానికి ఎక్కువ సమయమే పట్టే అవకాశం ఉన్న నేపథ్యంలో ప్రేక్షకుడి మదిని తొలిచేసే ప్రశ్నతో ముగించి ఉంటే ఇంకాస్త బాగుండేది. అలాగే ద్రాక్షాయణి(అనసూయ), మంగళం శ్రీను(సునీల్‌), భన్వర్‌ సింగ్‌ షెకావత్‌లను మాత్రమే పుష్పరాజ్‌ ఎదుర్కొంటాడా? లేక ఇంకేవైనా కొత్త పాత్రలు వస్తాయా? అన్నది ‘పుష్ప: ది రూల్‌’లో చూడాల్సి ఉంటుంది.

బలాలు
+ అల్లు అర్జున్‌
+ ప్రథమార్ధం
+ నటీనటులు
+ దర్శకత్వం, సాంకేతిక బృందం పనితీరు

బలహీనతలు
– ద్వితీయార్ధంలో కొన్ని సన్నివేశాలు
– నిడివి

– గొనప రాజు